ШТО ТРЕБА ДА ЗНАЕМЕ ЗА ХРОНИЧНАТА БОЛКА И ЈОГАТА
Охрабрувачка вест за луѓето со хронична болка е дека вежбите за умот и телото имаат заштитен ефект врз сивата материја на мозокот што се спротивставува на невроанатомските промени предизвикани од хроничната болка. Интересен податок е тоа што 20% од вкупната телесна потрошувачка на количините на кислород во организмот се трошат во мозокот, при што 95% од тоа се трошат во сивата материја.
Зголемувањето на сивата материја во мозокот кај тие што практикуваат јога е поврзано со времетраењето на практикувањето на јогата, што потврдува дека постои причинска врска помеѓу јогата и зголемувањето на сивата материја.
Без разлика дали практикувате јога еден час, дваесет минути или само пет минути, истегнувањето на телото може да ги намали болката, воспалението и несаканите повреди. Јогата исто така може да ви помогне да го смирите вашиот ум и да ги смирите вашите емоции. Кога ќе научите како да се опуштите, веќе сте на пат да заздравите од хроничната болка.
Денес, луѓето ширум светот користат јога за да се релаксираат, да останат во добро здравје и да си помогнат во ублажувањето на болката поврзана со хроничните состојби, како што се ревматоидниот артритис и фибромијалгијата, без прекумерна употреба на лекови или поинвазивни третмани на болката.
ДИШЕЊЕТО Е НАЈВАЖНО
Практикувањето на јогата започнува со вашиот здив, а многу од медицинските придобивки од јогата се однесуваат на длабокото дишење. Ако имате болка, можете да си помогнете во прв момент само со фокусирање на вашето внимание на дишењето. Забавувањето на дишењето му помага на целиот нервен систем да се смири и да се одмори.
За да започнете со вежбата, седнете во удобна седечка положба или легнете на грб со рацете покрај телото. Затворете ги очите и дишете полека и рамномерно најмалку 3-5 минути. Фокусирајте го вашето внимание на вдишувањето и издишувањето.
ЈОГА ПОЛОЖБИ КОИ ЌЕ ВИ ПОМОГНАТ
Во зависност од локацијата на симптомите на болка, различните јога положби можат да помогнат во истегнувањето или релаксирањето на проблематичните делови од вашето тело.
ПЕПЕРУТКА
Седнете на рамна површина и спојте ги стапалата па истегнувајте ги нозете наизменично кон долу и кон горе. Оваа положба ги истегнува колената и колковите, мускулите на половината и ја раздвижува целата карлица.
МОСТ
Легнете на грб со свиткани колена. Подигнете ја карлицата оставајќи ги рамената и стапалата на подот. Може да се повтори движењето неколку пати.
МАЧКА
Подигнете се на колена со дланките на подот. Подигнете го и истегнете го грбот нагоре, спуштајќи ја брадата кон градната коска. Па отпуштете ја половината и истегнете го телото кон назад, свиткувајќи ја и главата наназад. Повторете неколку пати.
ИСТЕГНУВАЊЕ ЛЕВО-ДЕСНО
Застанете со рацете кренати над главата, дланките споени. Нежно навалете се настрана со испружени рацете во една насока, а колковите во другата насока. Останете неколку секунди во оваа положба, истото направете го на другата страна. Во оваа положба ги истегнувате мускулите на рацете и телото. Оваа вежба помага и за одржување на рамнотежата.
ОБРАТНА ПОЛОЖБА
Легнете на рамна подлога со нозете потпрени на ѕид при што телото е поставено во форма на буквата „L“. Останете во оваа положба онолку долго колку што ви е удобно. Оваа положба со подигнувањето на вашите стапала, нежно ја смирува болката во долниот дел на грбот.
На долг рок, алтернативните третмани за болка, како што се јогата и медитацијата, би можеле да бидат и поефикасни од фармацевтските третмани за ублажување на хроничната болка.
